МБОУ "Кедандинская начальная школа-сад им. К.С. Чиряева"

Саха сэбиэскэй литературатын төрүттээччи, поэт, прозаик, драматург, общественнай-политическай диэйэтэл П.А.Ойуунускай төрөөбүтэ 125 сылыгар аналлаах сэтинньи ый 6—16 күннэригэр К.С.Чиряев аатынан Кыадаҥда оскуолатын оҕолоро, учууталлара, төрөппүттэрэ, үлэһиттэрэ кыттыылаах “Былатыан үйэ-саас тухары” диэн ааттаах тэрээһин буолан ааста. Бу декада чэрчитинэн “Үс саха төрүөҕэр, үөрүүлээх күнүгэр, Мин аатым ааттаныа, мин ырыам ылланыа” диэн оскуола библиотекара П.В.Иванова аһаҕас уруок ыытта.Учуутал Е.Е.Иванова “Кыһыл ойуун”-Халгый сугулааныгар” диэн 1937 с Халгый кулуубугар Н.Х.Константинов «Кыһыл ойуун» испэктээкили туруорбутун туһунан олус кэрэхсэбиллээх бэсиэдэни оҥордо. Оччотооҕу кэмҥэ бу испэктээкилгэ оонньообут билиҥҥи оҕолор хос эбээлэрин, эһээлэрин хаартыскатын көрөн сэргэхсийдилэр, үөрдүлэр-көттүлэр. Салгыы “Кэриэһим кэннибэр хааларым, кэхтибэт кэрэкэ тылларым”,- диэн учууталлар бэлэмнээбит презентацияларын көрдөрөн кэпсээтилэр.

Сэтинньи 16 күнүгэр тэрээһин күүтүүлээх уонна долгутуулаах түгэнинэн П.А.Ойуунускай хоһооннорун ааҕыыга оҕолорго күрэхтэһии ыытылынна.Оҕолор эрдэттэн бэлэмнэнэн бу күрэххэ көхтөөхтүк кытыннылар. Бу күрэҕи И.М.Гоголев аатынан Чочу оскуолатын директора В.А. Иванова, завуһа А.С. Петрова Чочу нэһилиэгин И.М.Гоголев аатынан музей директора А.С. Протопопова, “Үрүҥ уолан “ культурнай-спортивнай киин иһинэн үлэлиир Чочутааҕы народнай театр режиссера Нь.З. Дмитриева дьүүллээтилэр, көрдүлэр-иһиттилэр. Алын сүһүөх оҕолорго 1м В.Андреева (2 кыл.) ылла, 2м. П.Рыкунов (3 кыл.), 3м. С.Плешков (1кыл.) буоллулар.Орто сүһүөх оҕолорго 1м. А.Томская (8 кыл.), 2м. С.Васильев (7 кыл.), 3 м..А.Гаврильев (6 кыл.) буоллулар.Оҕолор өйдөбүнньүк бирииһинэн наҕараадаланнылар. Салгыы оскуола,детсад коллективын уонна төрөппүттэр кыттыылаах улахан коцердынан саха чулуу уола П.А.Ойуунускайга аналлаах декадабыт түмүктэннэ.